сабота, 7 февруари 2009

Државен завод за статистика

Деновиве имав потреба од некои статистички податоци за Македонија. Се разбира веднаш на што помислив беше веб страната на нашиот Државен завод за статистика. Бидејќи не ја користам често оваа страница, потребен ми беше google за да дојдам до нивниот URL, ништо страшно, денес не мора ништо да помниш, доволно е да загуглаш и најверојатно ќе добиеш врска кон она што ти треба.

И така стигнав на веб страната на нашиот државен завод за статистика, убав и шарен, мава со сина боја. Тоа што не користи половина од широчината на мојот монитор ми пречи ама што да правиме, 90% од веб страните така функционираат, барем кај нас во Македонија. Веројатно ја имаат дизајнирано веб страницата кога 800*600 резолуцијата на нашите екрани беше закон, па така од тогаш немале време да одат во чекор со подобрувањата на мониторите. Но тоа може да значи дека во оваа институција се занимавале со далеку посериозни работи. Што секако е добро, бидејќи ќе стигнам до податоците кои ми се потребни.

Графички убаво обликувани паѓачки менија. Башка веб страната е двојазична, ја има и на англиски јазик. Тоа што ако се наоѓате во некоја секција, да речеме земјоделство и шумарство, после менувањето на јазик (од македонски на англиски и обратно) секогаш ве носи на почетната страница, веројатно е пропуст на дизајнерите и тоа никој до сега не го забележал иначе веднаш ќе го исправеле. Само се прашувам дали некој од нив воопшто ја прелистува веб страната?

Ок, кој ми е виновен мене, што барам јајце во влакното. Да си терам јас кон мојата цел, до моите податоци. Еве ме интересираат некои податоци за пописот. Притискам на соодветното мени и стигнувам до Попис 2002. Една HTML страничка која многу не кажува за пописот, туку за тоа дека заводот подготвил книга за пописот и тоа во PDF формат.

Ок ја симнав, цели 384 KB. Искрено мене не ме интересираше целата книга, мене ме интересираа само некои податоци и очекував дека тоа ќе го видам директно на веб страницата. И така мојата интернет конекција е слаба, така да симнувањето на податотека со големина од 384 KB скапо ќе ме чини, ќе потрошам и време и интернет сообраќај. Но друг избор немам.

Ја прелистувам PDF книгата, веројатно другариве од заводот сметаат дека тоа е врвот на дигитализацијата, да се среди PDF книга и да се овозможи заинтересираните да ја симнуваат од нивната веб страна. Книгата е исто така двојазична (македонски и англиски). Сега веќе ми пречи тоа. Ако на нивната веб страна кога ќе изберев јазик, сите информации ми беа на тој јазик, сега во PDF книгава тоа не можам да го направам. Но и тоа не мора да е хендикеп, туку ќе да е предност. Покрај другото ќе си го извежбам и мојот англиски јазик.

Вели: Number od pages 52, Number of copies printed 300? Од кај па знаат дека 300 копии е бројот на испечатени копии, веројатно тие за себе си испечатиле толку и ја вметнале оваа бројка во PDF книгата. И така си читам страна на македонски, страна на англиски јазик. Попат си подучувам англиски и си думам дека не биле 52 страници, туку само 26. Што е и добро, бидејќи ако беше неколку јазично издание, ќе добиев 384 KB PDF книга со само неколку страничиња. Вака добивам цели 26 на македонски јазик, вклучително и насловната страница и страницата за содржина.

И читам, читам, до страница 13, методолошки објаснувања на македонски јазик, па продолжувам да читам до страница 19 истото тоа ама на англиски јазик. И така стигнувам до страница 20, на двојазична табела со податоци за населението по општини. Убаво.

PDF книгата може да си ја зачувате на вашиот диск. Може да селектирате дел од текстот во неа и да го копирате во некој ваш документ. За жал текстот не е пишуван во unicode, така да ќе морате да си набавите старински фонт за да можете тоа што сте го копирале да го исчитате на кирилица, или пак со помош на некој конвертор да го претворите во unicode текст. Па си се прашувам повторно, во кое време живеат и работат другарите од заводот за статистика? Се до 2005 година (кога е создадена оваа PDF книга) најверојатно не слушнале за unicode. Незнам за сега, но се надевам ако не слушнале до сега, дека ќе го прочитаат овој текст и ќе превземат нешто и во таа смисла.

Ги имаме следниве табели:
1: Вкупно население, домаќинства и станови во Република Македонија
2: Вкупно население на Република Македонија според петгодишни групи на возраст, по пол - вкупно
2a: Total population of the Republic of Macedonia according to five-years age groups, by sex - Male
2b: Total population of the Republic of Macedonia according to five-years age groups, by sex - Female
3: Total population of the Republic of Macedonia according the ethnic affiliation
4: Total population of the Republic of Macedonia at 10 years of age and over according to sex and literacy
5: Total population of the Republic of Macedonia at 15 years of age and over according to the educational attainment
6: Total population in the country at 15 years of age and over, according to the activity - Total
6a: Total population in the country at 15 years of age and over, according to the activity - Male
6b: Total population in the country at 15 years of age and over, according to the activity - Female
7: Individual households according to the type, size and composition
8: Type of living quarters, number and floor surface of dwellings, number of individual households and average floor surface by member of individual households

Насловите на погорните табели ги преземав на англиски, бидејќи поубаво ми стои латиница на англиски отколку латиница на македонски.

И крај на PDF книгата, вкупно 10 табели. Не видов некој графикон, а можеле да се потрудат да го направат и тоа. Освен картата со територијалната поделба на државата нема ништо друго во боја. Рака на срце и нема потреба од тоа, бидејќи се работи за текстуални податоци. Но сепак ова е PDF книга која ја даваат во електронска форма и можеле да вметнат и некоја графичка илустрација во боја. Дополнително можеле да вметнат и URL врски за дополнителни информации кон нивната веб страница, ама тоа не им текнало.

Искрено, ги најдов податоците кои ги барав. Но сепак тоа можеше да биде побрзо, доколку веб страната на заводот за статистика тоа ми го овозможеше.


copyright (c) 2008
Creative Commons Attribution ShareAlike 3.0 Unported
Смеете да ги користите содржините и да правите дела произлезени од нив, под услов соодветно да го наведете изворот и да ги дистрибуирате под лиценца компатибилна со оваа.